世上最孤單的地方 - 崔斯坦達庫尼亞

唔知大家有冇儲護照蓋章呢個習慣?小編我係極鍾意護照蓋章的,更因為東盟十國入面獨欠汶萊嘅入境蓋章,而特登走咗去汶萊2日!

咁大家又知唔知道,地球上最難得到嘅護照蓋章係邊個呢?北韓?太簡單啦!

答案係位於南大西洋的英國海外屬地 - 崔斯坦達庫尼亞 (Tristan da Cunha)!行政上屬於聖海倫娜嘅一部分,但由於位處太過偏僻,所以擁有自己嘅出入境管制部門。

崔斯坦達庫尼亞亦係世界最偏遠而又有人居住嘅島嶼,南非係距離呢度最近有人居住嘅陸地,個距離足足有成2816公里咁遠! 呢度嘅人口只有270人,99%都係住係首都七海愛丁堡市 (Edinburgh of the Seven Seas),真係求其一隊強國旅行團都可以淹沒呢度。唔講你唔知,Edinburgh of the Seven Seas 亦係目前世界上最長嘅英文首都名稱!

想嚟呢個島玩?咁你要請定多幾日大假啦!因為目前前往崔斯坦達庫尼亞嘅方法只有一個, 就係由南非出發,坐127個鐘船前往,而船期係不定期的

from852 幫大家用電郵聯絡過崔斯坦達庫尼亞嘅總督 Alex Mitham。佢回覆話十分希望可以見到香港人去當地旅遊,特區護照持有人可以獲得90日免簽證待遇,而BN(O)持有人則可以逗留180日。Alex仲話會幫我翻查過入境部門記錄,崔斯坦達庫尼亞到目前為止都未見過有特區護照持有人入境,你仲唔快啲去搶頭啖湯?

Leave a Reply