Author: Ladarius Wong

自從小編去完日本之後，就不停有人問我關於軍艦島嘅information，一個一個答我不如出個攻略啦。 軍艦島 (Hashima Island)，原稱端島，屬於九洲長崎市嘅一個外島。在明治時代因開採煤礦而一度興盛的端島，在礦場關閉後逐漸荒廢成為無人鬼城。長崎市政府在2014年起到上面興建咗一啲較為安全嘅行人棧道之後，就容許3間旅行社每日每間提供2個登岸day trip。 出發前往軍艦島得1個方法：跟團，自行登島除非得到政府許可，否則係違法嘅行為，最高罰款200000yen。 一般day tour 都係分開上下晝2個團，朝早團就9-10am 出發，下晝團就1-2pm 出發。成個tour 大約3小時，登島時間大約1小時左右。我今次參加嘅係 Gunkanjima Concierge (軍艦島コンシェルジュ) 嘅行程，早上團10:30出發，費用每人4300yen，經已包括登島費用。因為day tour 相當受歡迎，建議最少2個月前在官網留位，可以用信用卡網上付款。 上船地點有2個，一個係長崎市常盤港，另一個係伊王島港，後者離開長崎市相當遠，唔係自駕遊的話絕對唔建議。若果住係長崎市中心購物街附近的酒店，常盤港行路都去到。若果需要搭電車的話，就係「大波止」站落車，步行2分鐘即達。 行程出發前建議食飽飽同埋買定水先，因為跟住個3粒鐘除咗西北風之外，屎都冇得你食。係大波止站隔離就有一家西式餐廳，早餐300yen一位起，望住長崎港食早餐，個人都精神啲，同埋day tour 報到處就係呢間餐廳樓下。 報到時旅行社會要求你簽一張寫晒日文嘅嘢，個張嘢簡單啲講就係你死咗唔關旅行社事，即係一張生死狀，但係其實個島條棧道離開危樓超遠，咁都死你都應該係時辰到。去到報到counter，counter 會要求睇你嘅confirmation email。之後佢見你係外國人，就會比一張寫住英文嘅”boarding pass”你掛係頸。拎咗boarding pass 之後，個個唔識講英文嘅counter 會係咁同你講一堆日文，其實係問緊你要唔要租個講普通話或者英文嘅導賞錄音器，因為去到島上面個導遊係全程講日文的。 搞掂晒你就可以去登船橋旁邊排隊，早排隊的鳥兒有魚食，因為隻船嘅上層係開放式設計的，當隻船駛到軍艦島係會圍住個島行2個圈的，坐上層就可以無阻擋咁影靚相啦！ 由常盤港出發去到軍艦島航程大約30－40分鐘，途中會經過好多三菱重工嘅船塢。呢啲船塢就係當年守衛香港嘅加拿大長槍隊被俘虜後係日本做苦工嘅地方 *respect*，當年有唔少被擄嘅加拿大同埋義勇軍成員係長崎做苦工嘅時候犧牲。其實見到呢度呢啲船塢嘅心情係好沉重的，特別係船上面個電視不停地播放歌頌名古屋重工業嘅歷史，但係隻字不提當年受過難嘅戰俘，但呢度係佢哋主場，都無計。 去軍艦島（應該話去長崎)旅行，對於華人來講應該係屬於dark tourism，同去德國集中營、柬埔寨killer field、越南戰爭博物館沒有什麼差別，唯一唔同嘅就係個tour 唔會同你講呢度過去死過幾多人，包括日本人。成個行程不停歌頌三菱重工係軍艦島採煤對日本嘅經濟貢獻，個啲什麼不屈不撓嘅日本精神云云。事實嘅真相就係軍艦島係日本政府虐待政治犯同埋侵略地囚犯嘅地方，當年日本佔領朝鮮後，軍艦島頂點時有成3000個朝鮮政治犯被當成奴隸在軍艦島工作，有命回到朝鮮的卻沒有幾多個。 40分鐘後船去到軍艦島，因為都外海咁滯，所以浪都係唔細的。船長會圍住軍艦島轉2個圈比大家影相。根據其他人所講，因為軍艦島所在海域風浪相當難預測，所以有1／4機會會上唔到岸，原船遣返。我去個日雖然落住毛毛細雨，但係天公係上岸一刻做美，停雨停浪。 上岸後導遊就會馬拉松式不停講解，但係因為我一句日文都唔識聽，所以可以唔理佢四圍行影相，佢見你戴住外國人boarding pass都唔會理你。成條棧道全長約1公里左右，只係圍住東南部，占個島嘅海岸線1／8都無。棧道距離危樓亦都有一段距離（安全問題)，想影靚相建議帶長焦距鏡頭。成個trip就係啲日本人有日本人聽，外國人有外國人四圍走。除非你對軍艦島同長崎嘅歷史一無所知，否則呢個會係一個相當沉重嘅trip，我建議大家去完軍艦島可以去原爆紀念館，咁樣可以將所有嘅沉重感覺group 埋一日，唔駛分開2日受。 返到常盤港大約會係13:30，大家應該肚餓想去揾嘢食，買咗閃閃書嘅應該會去長崎港食sashimi：「千祈唔開去」，「千祈唔好去」，「千祈唔好去」，很重要所以要講3次。除非你想比千兩嘅價錢食爭鮮嘅嘢，唔係「千祈唔好去」。（很重要所以講多次）    如何前往 Getting there 旅客可以經過長崎或福岡空港前往，其中只有福岡空港提供國際航班服務。    簽證須知 Visa Requirements 持有以下護照人士可免簽證入境 Visa Waiver is granted […]