由細到大，每次行過尖沙咀海旁嘅時候，都會被一隻紅色嘅中式帆船吸引。小編對呢一隻船嘅認知，一直停留係「旅發局logo」、「遊客景點」呢一個層次，可能係一直都無機會更加親身地去了解呢一隻船：「鴨靈號」嘅過去。
「鴨靈號」係香港碩果僅存嘅中式帆船，佢嘅上半生係一隻水上人嘅捕蝦船。因為傳統捕蝦操作對環境破壞極大，所以政府立法禁止呢類船隻操作，自此鴨靈號就變成遊客景點，每日係維多利亞港中穿梭往來，成為香港嘅標記之一。
小編尋日係facebook見到鴨靈號推出優惠，30分鐘維港遊收費$50起。為咗滿足多年來嘅好奇心，二話不說就網上訂飛，今日出海一睹其廬山真面目！
係船上面有幸遇上船公司嘅業務發展總監 Charlotte，佢細心咁講解「鴨靈號」嘅「前世今生」，同埋發展歷史。經過佢嘅一番講解，我先至知道原來呢隻船同旅遊發展局係一啲關係都無的，完完全全係一間私營嘅中小企，為保存香港珍貴嘅歷史而係度努力奮鬥中。
疫情稍為緩和，旅行有冇得去但又天朗氣清嘅5月，不妨花少少錢嚟體驗吓係自己屋企做遊客嘅樂趣！
票價（特別優惠）：
日航－$50
夜航－$70
幻彩詠香江特別班次－$100
2小時文化體驗工作坊 － $170
網上訂票：
www.dukling.com.hk